خصوصيتك عندنا أمانة

كي تعمل حساب وتطلب، نجمعو برك المعلومات اللي نحتاجوها لطلبك:

• الاسم، ورقم الهاتف، والبريد الإلكتروني.
• عنوان التوصيل، وموقعك على الخريطة (تحدّدو بزرّ «حدّد موقعي» ولا بتحريك العلامة).
• الملاحظة اللي تكتبها على الطلب (كان كتبتها)، ويقراها فريق دهشة.
• منتجات طلبك ومبالغها وتواريخها (سجلّ طلباتك).
• كلمة المرور (تتخزّن مشفّرة).
• عنوان IP ونوع المتصفح وقت الطلب.
• كان كتبت تقييم لمنتج: اسمك وبريدك وتقييمك، وعنوان IP (واسمك وتقييمك يبانو للعموم).

الدفع كاش وقت التسليم، يعني ما نجمعوش معلومات بطاقتك البنكية.

• باش نسجّلو طلبك ونوصّلوه لباب دارك.
• باش نتواصلو معاك على طلبك (بالإيميل، وبالهاتف كان فما مشكل في الطلب).
• باش تتبّع طلبك وتعدّلو ولا تلغيه من حسابك.
• باش نحميو الدخول والتسجيل والدفع من الروبوتات.
• باش نحفظو سجلّ الطلبات والمحاسبة.

ما نبيعوش معلوماتك، وما نستعملوهاش للإشهار.

فريق دهشة

المخوّلين برك. يشوفو معلومات طلبك وحسابك باش يخدمو الطلب ويجاوبوك.

وسيط التوصيل

• كي طلبك يتعرض: يتعرض على وسيط وحدة في المرّة (الأقرب ليك)، وكان ما قبلوش يتعرض على وسيط آخر. في العرض يشوف اسمك وعنوانك ومنتجاتك.
• بعد ما يقبل الطلب: يشوف زادة رقم هاتفك وموقعك على الخريطة باش يوصّلك، وينجّم يتصل بيك بالهاتف ولا بالواتساب.
• وإنت تشوف من وسيط التوصيل: اسمو الأول ورقم هاتفو وكود التسليم، وكان وقت الطلب نشيط برك.

جهات تقنية

نستعملو جهات تقنية باش الموقع يخدم: الخرائط، والحماية من الروبوتات، والاستضافة، والبريد، وقاعدة بيانات الطلبات. كل جهة تتعامل مع المعلومات اللي تحتاجها لوظيفتها، وبعضها (كيما الخرائط والحماية من الروبوتات) عندو شروطو الخاصة.

• الموقع يخدم بتشفير (HTTPS).
• كلمة مرورك تتخزّن مشفّرة.
• الدخول والتسجيل والدفع محميّين من الروبوتات، وحسابك يتقفل مؤقتًا كان فما محاولات دخول غالطة برشا.
• معلومات الطلبات ما تبانش للعموم.
• وسطاء التوصيل لازم دهشة توافق عليهم قبل ما يبداو يخدمو.

ما فما نظام آمن 100٪، أما نعملو اللي نقدرو عليه.

تنجّم في أي وقت:

• تطلب تشوف المعلومات اللي عندنا عليك (الاطلاع).
• تطلب نصلّحو معلومة غالطة (التعديل).
• تطلب نمسحو معلوماتك (المسح).
• تعترض على استعمال معلوماتك.

كيفاش؟ ابعثلنا على البريد الرسمي contact@dehsha.com. نجاوبوك في يوم عمل، وننفّذو طلبك في 7 أيام.

اسمك وهاتفك وعنوانك وبريدك تنجّم تبدّلهم بنفسك من «حسابي».

قدّاش نحتفظو بيها؟ طول ما حسابك موجود ولين تطلب مسحها. كي تطلب المسح، نمسحو حسابك ومعلوماتك الشخصية. الفواتير والسجلات المحاسبية تبقى المدّة اللي يفرضها القانون، وفيها المبالغ والتواريخ بلا اسمك وهاتفك وعنوانك وموقعك.

موقعك: كي تدوس «حدّد موقعي»، المتصفح يطلب إذنك. موقعك ضروري للتوصيل، ويتحفظ مع الطلب. وكي تدوس على شارة وقت الصلاة، نستعملو موقعك في متصفحك برك باش نحسبو الوقت، وما يتبعثش لينا.

الكوكيز: نستعملو كوكيز ضرورية برك:

• كوكيز السلّة: باش تبقى منتجاتك في السلّة.
• كوكيز الدخول: باش تبقى داخل لحسابك.
• كوكيز الحماية من الروبوتات: في صفحات الدخول والتسجيل والدفع والتقييم.
• كوكيز التقييم: كان علّمت «احفظ اسمي وبريدي»، باش ما تعاودش تكتبهم.

ما نستعملوش كوكيز إعلانات ولا إحصائيات. وبعض الخدمات الخارجية (كيما الخريطة) ينجّمو يحطّو كوكيز خاصة بيهم.

المنتجات اللي تحطّها في المفضلة (القلب) تتحفظ في تليفونك برك، وما تتبعثش لينا.

عندك سؤال على خصوصيتك ولا تحب تستعمل حقّ من حقوقك؟ ابعثلنا على البريد الرسمي، ونجاوبوك في يوم عمل.